Mariage de Robin et de Marote
Part 1 – Lines 1-30
Marote (chante):
Robins m’aime, Robins m’a,
Robins m’a demandee, si m’ara.
Robins m’acata cotele
De burel et bonne et bele,
A leur i va.
Robins m’aime, Robins m’a,
Robins m’a demandee, si m’ara.
Li chevaliers (chante):
Je me repairoie du tournoiement,
Si trouvai bergiere seulete au cors gent.
Marote (chante):
Hé, Robin, se tu m’aimes,
Et par amours, maine m’ent.
Li chevaliers:
Bergiere, Diex vous doinst bon jour!
Marote:
Diex vous gart, sire!
Li chevaliers:
Par amour,
Douche puchele, or me contés
Pour coi ceste canchon cantés
Si volentiers et si souvent—
Hé, Robin, se tu m’aimes,
Par amours, maine m’ent?
Marote:
Biaus sire, il i a bien pour coi:
Car j’aim bien Robinet, et il moi;
Et bien m’a moustré qu’il m’a chiere.
Donné m’a ceste panetiere,
Ceste houlete et cest coutel.
Li chevaliers:
Or me di, veïs tu nul oisel
Voler par deseure ces cans?
Marote:
Sire, oïl je ne sai pas kans.
Encore en a en ces buissons
Et cardonnereul[e]s et pinçons
Qui mout cantent joliement.
Source: http://toisondor.byu.edu/dscriptorium/aix166/index2.html