Original French
36
Et d’eulx va France descombrant,
En recouvrant chasteaulx et villes.
Jamais force ne fu si grant,
Soient ou à cens ou à miles!
Et de noz gens preux et abiles
Elle est principal chevetaine.
Tel force n’ot Hector n’Achilles!
Mais tout ce fait Dieu, qui la menne.
37
Et vous, gens d’armes esprouvez,
Qui faites l’execution,
Et bons et loyaulx vous prouvez,
Bien faire on en doit mention
(Louez en toute nation
Vous en serez!), et sans faillance
Parler sur toute election
De vous, et de vostre vaillance.
38
Qui sanc, corps et vie exposez
Pour le droit, en peine si dure,
Et contre tous perilz osez
Vous aler mettre à l’avanture.
Soiés constans, car je vous jure
Qu’en aurés gloire ou ciel et los!
Car qui se combat pour droiture
Paradis gaingne, dire l’os.
39
Si rabaissez, Anglois, voz cornes
Car jamais n’aurez beau gibier!
En France ne menez voz sornes!
Matez estes en l’eschiquier.
Vous ne [le] pensiez pas l’autrier,
Où tant vous monstriez perilleux;
Mais n’estiez encour ou santier,
Où Dieu abat les orguilleux.
40
Ja cuidiés France avoir gaingnée,
Et qu’elle vous deust demourer.
Autrement va, faulse mesgnié[e]!
Vous irés ailleurs tabourer,
Se ne voulez assavourer
La mort, comme voz compaignons,
41
Que loups pevent bien devourer,
Car mors gisent par les sillons!
Et sachez que par elle Anglois
Seront mis jus sans relever,
Car Dieu le veult, qui oit les voiz
Des bons qu’ilz ont voulu grever!
Le sanc des occis sans lever
Crie contre eulz. Dieu ne veult plus
Le souffrir, ains les reprouver
Comme mauvais, il est conclus
42
En Christianté et l’Eglise
Sera par elle mis concorde.
Les mescreans dont on devise,
Et les herites de vie orde
Destruira, car ainsi l’acorde
Prophecie, qui l’a predit,
Ne point n’aura misericorde
De lieu, qui la foy Dieu laidit.
43
Des Sarradins fera essart,
En conquerant la Saintte Terre.
Là menra Charles, que Dieu gard!
Ains qu’il muire, fera tel erre.
Cilz est cil qui la doit conquerre.
Là doit-elle finer sa vie,
Et l’un et l’autre gloire acquerre.
Là sera la chose assovye.
44
Donc desur tous les preux passez,
Ceste doit porter la couronne,
Car ses faiz ja monstrent assez
Que plus prouesse Dieu lui donne
Qu’à tous ceulz de qui l’on raisonne.
Et n’a pas encor tout parfait!
Si croy que Dieu ça jus l’adonne,
Afin que paix soit par son fait.